Панама «Тамчы» АФИА менен атайын экономикалык аймактарды өнүктүрүү боюнча тажрыйбасы менен бөлүшөт

Кыргыз Республикасынын юстиция министри, «Тамчы» АФИАнын Башкаруу боюнча кеңешинин төрагасы Аяз Баетов Америка мамлекеттеринин уюмунун алдындагы Панаманын элчиси Ана Ирене Дельгадо менен жолугушуу өткөрдү.

Жолугушуу Кыргыз Республикасынын көз карандысыздыгынын 35 жылдыгын майрамдоо күндөрүндө чет өлкөлүк коноктордун Кыргызстанга болгон сапарынын алкагында, өлкөдө Шанхай кызматташтык уюмунун саммити жана VI Дүйнөлүк көчмөндөр оюндары сыяктуу ири эл аралык иш-чаралар өтүп жаткан учурда болду.

Тараптар эл аралык экономикалык кызматташтык жана инвестициялык байланыштарды кеңейтүү маселелери боюнча пикир алмашты. Аяз Баетов элчиге «Тамчы» АФИАнын моделин тааныштырып, юрисдикциянын өзгөчө укуктук жана салыктык режими, анын институционалдык түзүмү, ошондой эле заманбап ишкердик жана инвестициялык чөйрөнү калыптандыруу боюнча ыкмалары тууралуу айтып берди.

Программанын алкагында Дельгадо «Тамчы» АФИАнын аймагына да барды. Ага иштеп жаткан инфраструктура, анын ичинде «А» класстагы заманбап бизнес-борбор, ошондой эле курулуп жаткан объектилер — эл аралык аэропорт, кеңсе жана турак жай имараттары, медициналык жана калыбына келтирүүчү туризмге багытталган курорттук комплекстер көрсөтүлдү.

Жолугушуунун жүрүшүндө атайын экономикалык жана финансылык аймактарды түзүү жана өнүктүрүү боюнча эл аралык тажрыйбага өзгөчө көңүл бурулду.

Дельгадо «Тамчы» АФИАнын потенциалын жогору баалап, кыргыз тарап менен тажрыйба алмашууга көмөк көрсөтүүгө даяр экенин билдирди.

«Панама Борбордук жана Түштүк Американын логистикалык борбору болуп саналат. Биздин өлкөдө эркин соода боюнча мыйзамдар XX кылымдын башынан бери колдонулуп келет, ошондуктан мындай долбоорлордун логистикалык көз караштан алганда маанисин жакшы түшүнөбүз. Кыргыз Республикасы Борбордук Азиянын чок ортосунда жайгашкан. Ушул өңүттөн алганда, бизге долбоордун логикасы да, анын аймак үчүн мааниси да түшүнүктүү», — деди элчи.